منډه
بې خطره ده که څه هم
سرې او شنې لمبې له تيږو نه وباسي
د آس مسته جلالي جمالي منډه مې خوښيږي
خو چې پښې د کوم سپاره يې
په رکاب کې بندې نه وي
د لاس تورو او نېزو يې ماتې ماتې
د کوم پلي د زخمونو
په جامونو تندې نه وي
چې دا آس هم لاندې لاندې
نه تر زين او نه تر واک وي
جانانه، وحشي ښاغلی او خپلواک وي
منډه منډه يې تصوير د خبلواکۍ وي
چې نفرت يې سراسر له بلواکۍ وي
د عربو قصيدې يې
و جمال ته نه رسيږي
و جلال ته نه رسيږي
چې له نازه لومړۍ منډه لنډه واخلي
او دويمه په ادا پسې اوږده کړي
چې ذوقمنو ته ورياده
د پښتو ژبې ټپه کړي
خو د پړانګ او د زمري منډه که څه هم عجيبه ده
ډکه ډېره له پرتم له هيجانه
چې په شړنګ وي په هوسۍ پسې روانه
دغه منډه مې وي هغه مهال خوښه
چې ناکامه راستنه شي له میدانه
او هوسۍ ترينه ځان وباسي په منډه
د ژوندون تر بيابانه
پيرمحمد کاروان
دا مطلب شریک کړئ